Канмалли кунсенче Çĕнĕ Ахпỹрт, Туçа, Кивĕ Ахпỹрт, Анат Туçа, Кĕçĕн Патăрьел, Аслă Чемен, Первомайски, Сăкăт, Турхан, Шăхач ялĕсенче ял уявĕсем иртнĕ.

 Официаллă пайра ĕçре малта пыракансене, хастарсене, Украинăри ятарлă çар операцийĕнчен кĕске вăхăтлăх канăва килнисене чысланă. Вырăнти ташă-юрă ăстисен, чăваш эстрада артисчĕсен концерчĕ пулнă. Спорт ăмăртăвĕсем, аттракционсем илĕртнĕ. Паллах, суту-илỹ те ĕçленĕ.

Патăрьел муниципалитет округĕн пуçлăхĕ Рудольф Селиванов Çĕнĕ Ахпỹрт тата Çĕньял ялĕсен уявĕсене хутшăннă.

Çĕнĕ Ахпỹрт ялĕ ĕçченлĕхпе палăрса тăрать. Кунта сухан-севок нумай çитĕнтереççĕ. Территори пайĕнче Евгений Мартышкин, Людмила Краснова фермер хуçалăхĕсем, "Родина" ял хуçалăх кооперативĕ - пысăккисен йышĕнче. Евгений Мартышкин 177 гектар, Людмила Краснова - 220, "Родина" ял хуçалăх кооперативĕ 223 гектар çĕр çинче тĕрлĕ культура акса-лартса çитĕнтереççĕ.

Юлашки çулсенче Çĕнĕ Ахпỹртре пурăнакансем пуçару бюджечĕн программипе анлăн усă кураççĕ. Вĕсен тăрăшулăхĕпе Ленин тата Николаев урамĕсенчи çулсене юсанă.

Çĕньялта ял уявĕнче пĕтĕмĕшле пĕлỹ паракан тĕп шкул 125 çул тултарнине паллă тунă. Ăна 1899 çулта хутла вĕренмелли шкул тесе Владимир Гаврилович Гаврилов хуçалăхĕнчи йывăç çуртра уçнă. Икĕкласлăскере арçын ачасене çеç йышăннă. Пĕрремĕш учителĕ те Владимир Гаврилов пулнă. 1904 çулта шкул пĕрремĕш вĕренекенĕсене кăларнă. Пĕр ĕмĕр ытла хушăра вара кунтан 2500 ытла вĕренекен пĕлỹ илсе тухнă. Вăл йышра - паллă писательсем, наука ĕçченĕсем, спортсменсем. Кашнийĕшĕ Çĕньял шкулĕн историне, йăли-йĕркине чун-чĕрере тытса тăрать.

Сумлă лару-тăрура вĕренỹ çуртне уçакан Владимир Гаврилович Гаврилова асра тытса Асăну хăми уçнă.

"Паян шкул пĕлỹ тĕнчине çул çỹрев хывассине малалла тăсса пырать. Çавна май кашни вĕренекен хăйĕн малашлăхне уçма, пурнăçри çул-йĕрне палăртма пултарать. 125 çул хушшинче нумай улшăну пулнă. Пĕлỹ патне туртăнасси, йăла-йĕркене малалла тытса пырасси, тăван шкулпа мăнаçланасси çав-çавах юлнă, çỹллĕ шайра тăрать",- палăртнă Рудольф Селиванов кунта пурăнакансене юбилей ячĕпе саламласа.

 Альбина АСТРАХАНЦЕВА