КАШНИ çыншăн чи пысăк пуянлăх - сывлăх. Вăл ытларах чухне хамăртан килет. Çавăнпа та асăрханмалли, сыхă пулмалли самантсене, ĕмĕре кĕскетме пултаракан тĕслĕхсене пурин те шута илмелле. Акă, юлашки çулсенче республикăра та, муниципалитет округĕнче те хăрушă СПИД чирĕн вирусĕн инфекципе чирлисем хушăнса пыни пăшăрхантарать. Патăрьелĕнчи тĕп больницăри инфекци уйрăмĕн заведующийĕ Антонина Чернова пĕлтернĕ тăрăх, паянхи куна Юхмапа Пăла тăрăхĕнче çакнашкал ВИЧ инфекциллĕ 85 çын шутра тăрать. Чирлисен ушкăнне пĕлтĕр 7, кăçалхи çур çулта вара тепĕр 3 çын хутшăннă. Вĕсенчен ытларах пайĕ çемьеллĕ. Хăрушă амак серепине çакланнисенчен ют облаçе ĕçлеме çỹрекенсем ытларах.