Чăваш Республикин тата Раççей Федерацийĕн тава тивĕçлĕ строителĕ Владимир Степанович Сорокин (19.07.1929-17.02.2007) 95 çул каялла Вăтаелĕнче çуралнă.

Владимир Сорокин ĕç биографине 1945 çулта Киров ячĕллĕ колхозра пикеннĕ. Республикăри стройкăсенче каменщик, 2-мĕш стройтрестăн комплекслă бригадăн бригадирĕ, "Чăвашремстрой" трестăн Кỹкеçри юсавпа строительство управленийĕнче, Шупашкарти приборсем тăвакан заводăн пурăнмалли çурт-йĕрпе эксплуатаци управленийĕнче каменщик пулса тăрăшнă.

Строительство комплексне аталантарас тĕлĕшпе тунă тава тивĕçлĕ ĕçсемшĕн 1977 çулта унăн ятне ЧАССР Ĕç Мухтавĕпе Паттăрлăх Хисеп кĕнекине кĕртнĕ.

 Ентешĕмĕре Ленин, Октябрь Революцийĕ, "Хисеп палли" орденсемпе тата медальсемпе наградăланă.

РСФСР тава тивĕçлĕ тухтăрĕ Вера Федоровна Никитина (20.07.1934-12.11.2020) 90 çул каялла Туçара çуралнă.

Вера Никитина Хусанти медицина институтĕнчен вĕренсе тухнă хыççăн 1959-1960 çулсенче Туçари участок больницинче врач, 1961-1989 çулсенче тĕп врач пулса ĕçленĕ.

("Çулталăк кĕнекинчен")