Тăван çĕршывăн Аслă вăрçи кĕрленĕ вăхăтсем çултан-çул хыçа юлса пыраççĕ пулин те унăн суранĕ ветерансен, вăрçă ачисен чĕринче паянхи кун та пирчеймест. Анчах шел, вĕсем çулсеренех сайралса пыраççĕ. Пурăнаканнисем умĕнче вара эпир çĕре çити пуç таятпăр, вĕсене çирĕп сывлăх, канлĕ ватлăх сунатпăр.

 Турхан территори пайне кĕрекен Тури Тăрмăш ялĕнче (манăн тăван ял) паянхи кун 16 вăрçă ачи пурăнать. Вĕсенчен чылайăшĕ сывлăх тĕлĕшĕнчен те хавшанă, килтен тухсах та çỹреймеççĕ. Хастартараххисемпе тĕл пулса вăрçă синкерлĕхĕ, çав тапхăрти йывăр пурнăç пирки калаçу пуçартăмăр.

Вăрçă ачисен чылайăшĕн шăпи пĕрешкел темелле. Вĕсем пурте çамрăклах хура-шурне сахал мар курнă. Выçлăх, çитмен пурнăç хăшĕсене çамрăклах аслисемпе юнашар хирте пулма, крахмал пуçтарма, ача кỹммине сĕтĕрме тата ытти ĕçсене пурнăçлама тивнине аса илчĕç ватăсем. "Хальхи евĕр хырăм сарăличчен апат çисе те курман. Атте вăрçăра пулнăран анне сак тулли ачана выçă усрас мар тесе тăтăшах пашалу туса паратчĕ, курăк яшки пĕçеретчĕ. Аш-какайĕпе сĕт-çăвĕ сахал лекнĕ... Тумтирне вара пĕрин хыççăн тепри тăхăнса урама тухни те пулнă..."- çакнашкал сăмахсене куççуль витĕр аса илчĕç вăрçă ачисем.

Çак ушкăнри ватăсенчен чылайăшĕ ашшĕне ас тумаççĕ те, унăн ăшшине, пулăшăвне те туйман. Хăшĕсем ăна курман та. Йывăр шăпаллă ачасем амăшĕн, кукамăшпе асламăшĕн хỹтлĕхĕнче çеç пурăнса çитĕннине каласа пачĕç. Пĕве кĕрсен хĕрсемпе каччăсем пурте хуçалăх ĕçне хутшăннă, амăшне пулăшнă. Каярахпа хăйсем те çемье çавăрса ача-пăчаллă пулнă. Хальхи вăхăтра ачисемпе, мăнукĕсемпе савăнаççĕ. Вăрçă синкерлĕхне курнă ватăсем паян тăнăç пурнăçшăн, ачисемпе мăнукĕсен ырă малашлăхĕшĕн кĕл тăваççĕ, чиркĕве çỹрекенсем тăтăшах Украинăри ятарлă çар операцине хутшăнакан салтаксемшĕн, çĕнтерỹшĕн кĕл тăваççĕ.

 Сăн ỹкерчĕкре:

 Тури Тăрмăшри вăрçă ачисен пĕр ушкăнĕ (сулахайран сылтăмалла): Василий Петров, Валентина Петрова, Перасковья Васильева, Раиса Петрова, Вера Григорьева, Таисия Николаева.

Лидия БАСОВА, Аслă Чемен вăтам шкулĕн директорĕн çумĕ