РЕСПУБЛИКĂРА кашни кунах телефон мошенникĕсем çынсене чике тăршшĕ лартса шар кăтартни пирки çыраççĕ. Шел пулин те, усалăн ури чăнах та саккăр пулни сисĕнет. Хăйсен пайтишĕн услам тăвакансем те, вĕсен серепине çакланакансем те йышлансах пыраççĕ. МИХ хатĕрĕсенче, Интернетра йĕрке хуралĕн ĕçченĕсем çакнашкал тĕслĕхсем пирки асăрхаттарсах тăраççĕ пулин те палламан çынна ĕненсе вăл мĕн "хушнине" пурнăçлакансем тупăнсах тăраççĕ. Иртнĕ эрнере çеç тĕп хуламăрти çап-çамрăк тухтăр каллех "хăрушсăр счет" çине 1,5 миллион тенкĕ (!) куçарса пани пирки çырчĕç. Телефонпа "ФСБ ĕçченĕ" тесе паллаштарнă çын чылай чухнехи пекех банкри ултавçă-ĕçченсене тытма пулăшма шантарнă...