Патăрьел муниципалитет округĕнчи ялсенче çулсеренех халăх пурнăçне хăтлăлатас, урамсемпе тăкăрлăксене илем кỹрес, масар таврашне тирпейлес, культура çурчĕсене çĕнетес, шкулсене юсас, çĕнĕ объектсем хута ярас тата ытти ыйтупа курăмлă ĕçлесе пыраççĕ. Çак тĕллевпе наци проекчĕсемпе, республика программисемпе те анлă усă кураççĕ. Муниципапалитет округĕн бюджетĕнчен те ял халăхне пурăнма, канма, сывлăха тĕреклетме, çамрăксене аталанма кирлĕ услови туса парас тĕллевпе çулсеренех сахал мар укçа-тенкĕ уйăраççĕ. Юлашки çулсенче республика пулăшăвĕпе тата халăх хăй ирĕкĕпе кирлĕ ыйтăва татса пама пуçарулăх кăтартни те вырăнсенче инфратытăма çĕнетме, ырă улшăну тума пулăшса пырать.

Кăçал Первомайски территори пайĕнче пуçару бюджечĕн программипе икĕ проекта пурнăçа кĕртме палăртнă. Пĕрремĕшне - Первомайски масарĕ патне каякан çула юсассине - çветтуй Троица уявĕчченех юсаса пĕтерчĕç. Çак çул 800 метр тăршшĕ. Пуçарăвăн пысăк пайне - 409 пин тенкине - "Куснар" çĕр ĕç фирми хăй çине илчĕ. Халăх хастарлăхĕпе 200317 тенкĕ пуçтарнă.

2024 çултах Первомайски территори пайĕнчи Анат Чакă ялĕнче 100 вырăнлă капăр клуб юсаса çĕнелмелле Ăна та пуçарулăх бюджечĕпех тума палăртнă. Çак кунсенчех юсав ĕçĕсене пикеннĕ. Подрядчикĕ - ИП Ленар Шакиров. 240 ытларах çынлă ялта халăх вăйĕпех клуба тĕпрен çĕнетме, унта хăтлăх кĕртме çăмăл мар паллах. Ку тĕлĕшпе Анат Чакăсем телейлĕ тесшĕн. Çак ялта çуралса ỹснĕ ырă кăмăллă меценат, Шупашкарти "Лента" акционерсен уçă обществин генеральнăй директорĕ Роза Иванова (Сидорова) тăван ен хăтлăхĕшĕн 3 миллион тенкĕ (!) ял клубне тĕпрен юсама уйăрнă. Ырă тунăшăн ăна темиçе хут сăвап пултăрах...

Ентешĕмĕр ытти чухне те тăтăшах тăван тăрăх аталанăвĕшĕн чун-чĕререн тăрăшать. Унăн хастарлăхĕпех çак ялтах ача-пăчана выляса савăнмалли лапам хута кайрĕ. Сăмах май каласан, Роза Иванова 2017 çулта "Патăрьел районĕн меценачĕ" хисеплĕ ята та тивĕçнĕ. Вăл Первомайски территори пайĕн çеç мар, муниципалитет округĕн мăнаçлăхĕ, хисеплĕ гражданинĕ. Çакнашкал ырă чунлă çынсем нумай пулсан эпир пурăнакан ялсем тата ытларах капăрланĕç.

Наталия ЕРМОШКИНА, Первомайски территори пайĕн тĕп специалист-эксперчĕ