Паян Юхмапа Пăла тăрăхĕнчи кашни ялта тенĕ пекех Украинри ятарлă çар операцине хутшăнакан салтаксем валли усăллă ĕç тума, хỹтĕлев сеткисем çыхса пулăшма тăрăшаççĕ.

 Çак ĕçе эпир те хастар хутшăнатпăр. Маларах Анат Тăрмăшпа Çăл Атăкри хĕрарăмсем Çĕньял клубне çỹрерĕмĕр, унта вырнаçтарнă станок умĕнче сеткăсем çыхрăмăр. Патăрьел муниципалитет округĕнчи депутатсен Пухăвĕн депутачĕ Борис Емельянов пире автомашинăпа илсе кайса килетчĕ. Çĕнĕ çул хыççăн вара Анат Тăрмăшри культура çуртĕнчех çак ĕçе йĕркелесе ятăмăр. Ял хастарĕ Александр Едриванов пире валли ĕçлеме услови туса пачĕ, сеткăна çыхмалли хатĕре вырнаçтарчĕ. Халĕ вара ялти культура çурне кашни кун тенĕ пекех ял-йыш çар операцине хутшăнакансем валли ырă ĕç тума пуçтарăнать. Тепĕр чухне 50 çынна яхăнах тăратпăр çыхмалли хатĕр умне. Валентина Путякова, Аннăпа Евгения Шашковасем, Елена Петрова, Алина Осипова, Светлана Яковлева, Ольга Антипова, Наталия Ярушкина, Валентина Васильева тата ыттисем те сăваплă та пархатарлă ĕçе чун-чĕререн хутшăнаççĕ. Пурне те тав сăмахĕ каламалăх пур.

Салтаксем валли хỹтĕлев сеткисем çыхма чăн малтанах ĕç хатĕрĕсене туянмалла. Ку тĕлĕшпе те пирĕн чăрмав çук. Ял-йыш таварсене туянма кар тăрать. Уйрăм предпринимательсем, ырă çынсем пулăшнине те палăртса хăварасшăн. Ку тĕлĕшпе ял çыннисене Вениамин Остроумов тăтăшах алă тăсать. Сергей Петров çыхмалли материал туянма 50 пин тенкĕ куçарса пачĕ. Ентешсем иккĕшĕ те Шупашкарта пурăнаççĕ, çапах та ял малашлăхĕшĕн, тирпей- илемшĕн, хăтлăхшăн чунтан тăрăшаççĕ.

Пĕрлехи вăй яланах ĕçре хавхалану кỹрет. Çак мелпех ял клубĕнче кану мероприятийĕсене те йĕркелесе пыратпăр. Культура ĕçченĕсене юрра-ташша ăста Алинăпа Владимир (купăсçă) Осиповсем тăтăшах пулăшса пынине те палăртасшăн. Питравра вĕсен хастарлăхĕпех ял çыннисемпе вăйă ирттертĕмĕр.

Людмила МЕРЗЛОВА, Анат Тăрмăшри культура çурчĕн ĕçченĕ