"01" служба ĕçченĕсен профессийĕ теветкеллĕ, яваплă, çав вăхăтрах хисеплĕ те. Вут-çулăмпа куçа-куçăн кĕрешекенсем инкеке вăхăтра парăнтарас тесен хăйсен тивĕçне пысăк шайра пурнăçланисĕр пуçне чăн малтанах сывлăх тĕлĕшĕнчен çирĕп, çаврăнăçуллă, вăр-вар тата спортпа питĕ туслă пулмалла. Иртнĕ эрнере Патăрьелĕнчи 26-мĕш пушар чаçĕн территорийĕнче пушарпа çăлав спорчĕн республикăри ăмăртăвĕнче вĕсем çакна пур енлĕн кăтарма пултарчĕç те.

Пушарниксен республикăри ăмăртăвне "Чăваш Республикинчи пушара хирĕç кĕрешекен служба" хысна учрежденийĕн начальникĕ Герман Михайлов, Патăрьел муниципалитет округĕн пуçлăхĕн пĕрремĕш çумĕ - строительство, çул-йĕр хуçалăхĕ тата хăтлăх управленийĕн начальникĕ Равиль Ямалетдинов хутшăнчĕç, служба ĕçченĕсене çăмăл мар ĕçре те, ăмăртура та, пурнăçра та ăнăçу сунчĕç.

Тупăшăва 12 команда хутшăнчĕ: Сосновка, Киря поселокĕсем, Элĕк, Патăрьел, Комсомольски, Красноармейски, Хĕрлĕ Чутай, Муркаш, Пăрачкав, Шăмăршă, Елчĕк, Тăвай муниципалитет округĕсенчи пушарпа çăлав службисем. Спорт ăмăртăвĕ вĕрентỹ башнин тăваттăмĕш хутне кантăкран меслетлесе куçарса çỹремелли пусмапа (лестницăпа) хăвăрт хăпарассинчен пуçланчĕ. Çак задание ăмăртăва хутшăнакан кашни сотрудник тăрăшса, вăр-вар пурнăçлама тăрăшрĕ.

Ăмăртун иккĕмĕш пайĕ Кĕçĕн Патăрьелĕнчи "Олимп" стадионта малалла тăсăлчĕ. Кунта вĕсем тĕрлĕ чăрмавсемпе 100 метра чупса, "пушар" сỹнтерме кайма шыв тултарассипе хăйсен ăсталăхне тĕрĕслерĕç.

Çивĕч кĕрешỹре пĕрремĕш вырăна Патăрьелĕнчи 26-мĕш пушар чаçĕн команди йышăнчĕ. Унăн чысне Сергей Михайлов, Николай Елимов, Владимир Раков, Рефис Гимаев, Александр Семенов хỹтĕлерĕç. Иккĕмĕшпе виççĕмĕш вырăнсене Муркашсемпе Комсомольскисем пайларĕç.

Альбина ЕГОРОВА