Театр актерĕ, режиссер, РСФСР тата ЧАССР искусствăсен тава тивĕçлĕ ĕçченĕ, Çеçпĕл Мишши ячĕллĕ Чăваш комсомолĕн премийĕн лауреачĕ Алексей Григорьевич Васильев (03.08.1934-17.06.2010) 90 çул каялла Каншелĕнче çуралнă.

А. Васильев - Ленинградри патшалăх театр институчĕн режиссура уйрăмĕн выпускникĕ. Унăн пурнăçĕ пĕтĕмпех республикăри театрсемпе çыхăннă пулнă: Чăваш патшалăх çамрăксен театрĕн актерĕ, К.В.Иванов ячĕллĕ Чăваш патшалăх тата Вырăс драма театрĕсен режиссерĕ, 1969-1996 çулсенче Çеçпĕл Мишши ячĕллĕ Чăваш патшалăх çамрăксен театрĕн тĕп режиссерĕ тата художество ертỹçи.

 Вăл чăваш драматургĕсен пьесисем тăрăх 90 ытла спектакль лартнă.Çавăн пекех вырăс тата ют çĕршыв классикĕсен ĕçĕсене те сцена çине кăларнă. Тĕп спектаклĕсем: А.Артемьевăн "Салампи", В.Астафьевăн "Каçарсам мана", В.Маяковскин "Хăнкăла", В.Шукшинăн "Пăнтăр-пăнтăр балалайка", Л.Стумбрен "Хĕрлĕ çỹçлĕ арçын", А.Пăрттан "Вăрмана юлнă çамрăклăх", Н.Терентьевăн "Çĕпĕр дивизийĕ", "Арканнă юрату", "Пурăнасчĕ çынсем пек" тата ыттисем те.

Профессионал редактор, журналист, куçаруçă, Чăваш Республикин культурăн тава тивĕçлĕ ĕçченĕ, Раççей Писателĕсен пĕрлĕхĕн членĕ Ирина Вингеровна Митта 65 çул каялла Первомайскинче çуралнă. ъИ. Митта А.М.Горький ячĕллĕ СССР Писательсен союзĕн Литература институтĕнчен вĕренсе тухнă хыççăн Чăваш кĕнеке издательствинче художество тата ача-пăча литературин редакторĕ, "Лик Чувашии" журналта пай редакторĕ тата журналăн тĕп редакторĕ, Чăваш Республикинчи Наци академийĕн редакципе издательство пайĕн начальникĕ пулса ĕçленĕ. Çавăн пекех Чăваш Республикин патшалăх власть органĕсенче, "Тăван Атăл",

ЛИК" журналсенче, Раççей коопераци университечĕн тытăмĕнчи Шупашкарти коопераци институтĕнче те тăрăшнă.

Ирина Митта чăваш прозине вырăсла куçарас тĕлĕшпе нумай ĕçленĕ. Куçарăвĕсем уйрăм кĕнекесемпе те, "Дружба народов", "ЛИК" журналсенче те пичетленнĕ.

 ("Çулталăк кĕнекинчен")