ИНТЕРНЕТ тетелĕнчи ултавçăсем тĕрлĕ майпа çынсен шанăçне кĕрсе хăйсен пайтишĕн укçа-тенкĕ "ĕçлесе" илеççĕ. Юлашки вăхăтра Раççейри пĕлтерỹсен "Авито" сайчĕпе усă курса тавар туянас текенсем те мошенниксен серепине çакланаççĕ.

РФ ШĔМĕн муниципалитетсем хушшинчи "Батыревский" уйрăмĕнчи полицин обществăлла йĕркелĕхе сыхлакан çумĕ Алексей Быков "Авангард" хаçат редакцине пĕлтернĕ тăрăх, иртнĕ эрнере çеç Юхмапа Пăла тăрăхĕнче те çакнашкал пăтăрмах пулнă. Анчах та Перекет банкĕн ĕçченĕсен професси ăсталăхне пула ăна 900 пин тенкĕ укçасăр юласран хăтарнă. Аслă Чементи 60 çулсенчи арçын шăпах "Авито" урлă стройматериал туянма пĕлтерỹри хуçипе калаçса татăлнă. Лешсем ăна укçине куçарсан килне çитерсех пама шантарнă. Банк сотрудникĕсем ĕç-пуçа тĕпченĕ хыççăн операцие чарса лартнă, кун пирки çийĕнчех полицие пĕлтернĕ. Арçыннăн счет çинчи укçине сыхласа хăварнă. Çапах та вăл хăй пирки ултавçăсене кирлĕ информацие пĕлтерсе ĕлкĕрнĕ.