Цифровизаци куллен вăй илсе пырать. Çакă çынсен пурнăçне, уйрăмах ĕçе çỹрекен çамрăксенне, чылай çăмăллатма май парать. Электричествăпа усă курнăшăн та килте ларнă çĕртех, çывăхри почта çыхăну уйрăмне е банка каймасăрах, татăлма пултаратпăр. Телефонра е компьютерта уйрăм кабинет (личный кабинет) пулсан пушшех те аван. Шăпах çакăн пирки августăн 6-мĕшĕнче Чăваш Енри энерги сутакан компанин районсем хушшинчи Патăрьелĕнчи уйрăмĕн директорĕ Дмитрий Гаврилов журналистсемпе ирттернĕ пресс-конференцинче тĕплĕн ăнлантарса пачĕ.

Паяна республикăра Чăваш Енри энерги сутакан компанин тивĕçтерĕвĕсемпе усă куракансенчен вăтамран 40 проценчĕ электричествăшăн онлайн майпа татăлать, 25 проценчĕ квитанцисене электронлă мелпе илет. Муниципалитетсенче ку кăтарту пĕчĕкрех. Çакă ялта пурăнакансем хушшинче аслă çулхисем нумаййипе, вĕсем смартфонпа, компьютерпа ĕçлеме пĕлменнипе çыхăннă. Анчах та самана таппинчен юлманнисем те чылайăн. Нумайăшне ывăл-хĕрĕ, мăнукĕсем, кỹршисем электричествăшăн шăпах уйрăм е харпăр кабинет урлă татăлма пулăшаççĕ.

Ятарлă приложени мĕн тума кирлĕ-ха? Чи малтанах кунта пурте куç умĕнче: хăçан тỹлени, миçе тенкĕ тăкаклани, счетчик кăтартăвĕсем тата ытти те. Тепĕр лайăх ен - тỹлевшĕн комисси те çук. Темиçе счет та вырнаçтарма май пур.

 Телефонра уйрăм кабинет пултăр тесен Чăвашри электроэнерги сутакан компанин приложенине (Чувашская электросбытовая компания - ЧЭСК) вырнаçтармалла. Килте тăваймасан районсем хушшинчи Патăрьелĕнчи уйрăмĕнче вăй хуракансем ыйтăва çăмăллăнах татса параççĕ. Специалистсем организацисемпе предприятисене, ялсене те тухса çỹреççĕ. Харпăр кабинет тăвас шухăшлисене пурне те пулăшаççĕ.

Аслă çулхисем счетчик кăтартăвĕсене хут çине çырса тỹлеме хăнăхнă, ун пеккисен вара мĕн тумалла-ха? Дмитрий Гаврилов çак ыйтăва хуравланă май нимшĕн те пăшăрханмалла маррине, малашне те ятарлă кĕнекепе почта çыхăну уйрăмне е Чăваш Енри энерги сутакан компанин районсем хушшинчи Патăрьелĕнчи уйрăмне килсе тỹлеме пултарнине каларĕ.

Малашне Энерги сутакан компанинчен потребительсем патне хут квитанцисем те килмеççĕ, ун вырăнне электронлине яраççĕ. Пурин те смартфон çук, çавăнпа та аслă çулхисем хут квитанцисем кирлине пĕлтерсе е мĕнле те пулин ăнланман ыйту сиксе тухсан кол-центра 8-800-2000-742 тата 8(8352)36-80-03 номерсемпе шăнкăравласа ыйтма, Чăвашри электроэнерги сутакан компанине кайса килме, пĕрлех сайтне, социаллă сечĕсене çырса яма пултараççĕ.

Ольга ПАВЛОВА