Чăваш Республики Курск облаçĕнче нацистсен террорла хăрушлăхне пула шар курнă çынсене пулăшма çийĕнчех кар тăчĕ, гуманитари тиевĕсене ăсатрĕ.

 Юхмапа Пăла тăрăхĕнче пурăнакансем те çак инкеке пĕрле пайлас тĕллевпе Патăрьелĕнчи "Бизнес-инкубаторăн" çуртĕнчи 110-мĕш пỹлĕмре йышăну пункчĕ уçнă. Акă мĕн пĕлтерчĕ кун пирки округри халăха социаллă хỹтлĕх паракан центр начальникĕ Николай Ялуков:

- Чăваш Республикинчи ĕç тата социаллă хỹтлĕх министрестви пуçарăвĕпе Курск облаçĕнчи çынсем валли гуманитари пулăшăвĕ пуçтарма пикеннĕ. Курупкăсене тултарма тумтир (çĕнни), хăвăрт пăсăлман апат-çимĕç, шыв, шампуньсемпе супăньсем, гигиена таврашĕ тата ыттине те илсе килме юрать. Йывăрлăхра алă тăсса пулăшни пурне те ырăпах таврăнĕ,- терĕвăл.

Çавăн пекех çĕнĕ вĕренỹ çулĕ умĕн Патăрьел муниципалитет округĕ Запорожье облаçĕнчи Бердянск районĕнчи шефа илнĕ Осипенковри шкула та гуманитари пулăшăвĕ ăсатнă. Патăрьел муниципалитет округĕнчи вĕрентỹ, çамрăксен политики, физкультура тата спорт управленийĕн начальникĕ Ирина Рубцова хаçат редакцине пĕлтернĕ тăрăх, ыр кăмăллăх акцине Юхмапа Пăла тăрăхĕнчи кашни вĕрентỹ учрежденийĕ хутшăннă.

Альбина ЕГОРОВА