Августăн 12-мĕшĕнче Юхмапа Пăла тăрăхĕнче "Паттăр" спорт шкулĕ йĕркеленсе кайса ĕçлеме пикенни 50 çул çитрĕ. Çак тапхăрта тренерсемпе преподавательсем ертсе пынипе пултаруллă та талантлă спортсменсем Патăрьел муниципалитет округĕн чысне Чăваш Республикинче, Раççейре, Тĕнче шайĕнче хỹтĕлесе те палăрчĕç. Вĕсем пурте - пирĕн мăнаçлăх, хавхалану.

Çур ĕмĕрхи тапхăрта спорт шкулĕ хăй те çĕнелсе улшăнчĕ, пуянланчĕ. Паян "Паттăр" ФСК çумĕнчи спорт шкулĕнче çамрăксен сывлăхне çирĕплетме мĕн пур услови çителĕклĕ. Кунта вуншар секци ĕçлет, икĕ бассейн, хăтлă тренажер, волейбол, теннис залĕсем пур. Çуллахи вăхăтра Патăрьелĕнчи стадионта та тĕрлĕ ăмăрту иртет.

2023 çул итогĕпе пирĕн Патăрьел муниципалитет округĕ Раççей шайĕнче спорт мастерĕсем хатĕрлес тĕлĕшпе Чăваш Республикинче кăтартуллисен йышĕнче. Пĕлтĕр çеç Ранис Кардоновпа Николай Мазяков Раççей спорт мастерĕн ятне тивĕçрĕç.

Çакна та палăртма кăмăллă. Пĕлтĕр хăйсен пурнăçне физкультурăпа тата спортпа çыхăнтарнисем 62 процент (республикипе - 57 процент) пулнă. Çак тĕслĕх те пирĕн муниниципалитет округĕнче спорт шкулĕсем, спорт залсемпе стадионсем тулли хăватпа ĕçленине, патшалăх çакăн çине пысăк тимлĕх уйăрнине, çынсем сывă пурнăç йĕркине кăмăлланине çирĕплетет.