Çĕньял территори пайĕнчен Украинăри ятарлă çар операцине хутшăнакан салтаксем те ыттисем пекех çĕршыв умĕнчи хăйсен тивĕçне чун-чĕререн пурнăçлаççĕ. Вĕсенчен тăватă паттăр - Илья Бобров, Артур Елимов, Николай Захаров, Денис Савельев - Жуков медальне тивĕçни пирки вулаканăмăрсене пĕлтернĕччĕ.

Тỹрĕ чунлă паттăр салтаксем çак тăрăхра татах та пур. Нумай пулмасть çеç çар операцийĕ пуçланнăранпах нацистсене хирĕç кĕрешекен Денис Елимов та çарти паттăрлăхпа хăюлăхшăн "За отвагу" медале илме тивĕçнĕ.

 Денис Çĕньялти вăтам шкултан вĕренсе тухнă хыççăн чăн малтанах Мускава ĕçлеме кайнă. Çар операцине хутшăниччен вара Костромара десант çарĕнче службăра пулнă, ун хыççăн хăй ирĕкĕпе çар операцине хутшăнма контракт çырнă.

 Салтак (сăн ỹкерчĕк çемье архивĕнчен) тăвансемпе, ентешсемпе тăтăшах çыхăну тытать. Отпуска килсен шкул ачисемпе, пулас салтаксемпе тĕл пулусем йĕркелет, спортпа туслă пулни, лайăх вĕренни çар пурнăçĕнче те пысăк пĕлтерĕшлĕ пулнине калать.

Альбина НИКОЛАЕВА