Пурнăçра тĕрĕс професси суйласа илни пысăк вырăн йышăнать. Юратнă ĕç вăй хушать, йывăрлăхсене çĕнтерме пулăшать, чуна та хавхалану кỹрет. Аслă Чементи ветеринари участокĕн заведующийĕ Татьяна Семенова ветеринар шăпах çакна палăртать. Шăхач хĕрĕ 2010 çултанпа кунта тăрăшать. Маларах вăл "Мир" хуçалăхра ферма заведующийĕнче вăй хунă.

- Ачаранах выльăхсене юрататăп. Уйрăмах лашасем питĕ килĕшеççĕ. Патăрьелĕнчи професси училищине, халĕ агропромышленность техникумĕ, ветфельдшера вĕренме каясси пирки килтисене пĕлтерсен пĕри те хирĕçлемерĕç. "Питĕ лайăх, кирлĕ ĕç, - терĕ атте ырласа. Шел, вăл паян пирĕнпе юнашар мар. Вĕреннĕ вăхăтрах осеменаторта та вăй хутăм, - терĕкалаçу сыпăннă май Татьяна Федоровна.

Выльăх тухтăрĕ ветеринари участокне килсенех ветсанитарта тăрăшнă. Хăйне ĕç опытне алла илме пулăшнă Галина Зотовăна, Светлана Михайловăна паян та тав сăмахĕ калать. Ĕçленĕ май хĕр пĕлĕвне те аталантарас тенĕ, Шупашкарти аграри университетĕнчен ветеринара вĕренсе тухнă. 2016 çулта ăна Аслă Чементи ветеринари участокне ертсе пыма шаннă.

Кашни профессин хăйĕн кăткăслăхĕ, вăрттăнлăхĕ пур. Ветеринар ĕçĕ те яваплăх ыйтать. Ахальтен мар ĕнтĕ: "Врач çынна сиплет, ветеринар - этемлĕхе" - теççĕ. Хăрушă амакпа чирлĕ выльăх ыттисемшĕн çеç мар, çын сывлăхĕшĕн, пурнăçĕшĕн хăрушлăх кăларма пултарать. Çакна шута илсе Татьяна Семенова тата ăна пулăшакан Надежда Лябукова профилактика ĕçĕсене вăхăтра пурнăçлаççĕ. Васкавлă пулăшу кирлĕ чухне талăкăн хăть хăш вăхăтĕнче те чĕннĕ çĕре каяççĕ. Ун пекки вара пулкаласах тăрать.

- Юлашки çулсенче ĕнесем пăруланă хыççăн порезпа нушаланаççĕ. Инкекрен сыхланса халăхпа тĕл пулнă чухне чир пирки ăнлантарса паратпăр, мĕн çитермеллине калатпăр. Пĕрремĕш пулăшу памалли эмелсене илсе хума ыйтатпăр, - терĕ Татьяна Федоровна.

- Çавăн пекех уйăхра пĕрре сĕт пахалăхне тĕрĕслетпĕр. Выльăх йăхтарассипе те ĕçлетпĕр. Патшалăх ĕнесене искусствăлла майпа пĕтĕлентернĕшĕн тăкакланнă укçан пĕр пайне субсидилет. Çынсене укçине каялла илме документсем хатĕрлесе паратпăр.

Тăрăшса, кăмăлтан вăй хураççĕ Аслă Чементи ветеринари участокĕнче ĕçлекенсем. Ахальтен мар ĕнтĕ çулленех муниципалитетри ветеринари участокĕсем хушшинче çулталăк пĕтĕмлетĕвĕпе малти вырăнсене йышăнаççĕ. Пĕлтĕр иккĕмĕш тухнăччĕ, кăçал - виççĕмĕш. Татьяна Семенова çитĕнỹсем тума выльăх-чĕрлĕх чирĕсемпе кĕрешекен районти ветеринари станцийĕн коллективĕ лайăххи, яланах тĕрев пани, Петр Ефимов ертỹçĕн канашĕсем, вĕрентсе пынисем пулăшнине, пĕрле ĕçлекен Надежда Лябуковăпа çур сăмахранах пĕр-пĕрне ăнланнине, мăшăрĕпе Никита ывăлĕ хавхалантарнине калать. Сăмах май, Татьяна Федоровна кăçал округра иртекен "Професси тĕлĕшĕнчен чи лайăххи" конкурсра та палăрчĕ, çавăн пекех республикăра Мартăн 8-мĕшĕ умĕн ветеринари отраслĕнче вăй хуракансем хушшинче йĕркеленĕ тупăшура та "Хавхалану мисĕ" ята çĕнсе илчĕ.

Надя Лябукова та чылай çул ветеринари участокĕнче вăй хурать. Улатăр округĕнчи Кивĕ Эйпеçре çуралса ỹснĕскер, Патăрьелĕнчи агропромышленность техникумĕнче ветфельдшера вĕренсе тухнă. Ĕçтешĕ пекех ĕнесене йăхтарассипе те тимлет.

- Пирĕн ĕçре профессие юратмасан вăй хураймастăн, - тет виçĕ ача амăшĕ кăмăллăн.

Семеновсем те, Лябуковсем те картиш тулли выльăх усраççĕ. Пушă вăхăт тупăнсанах иккĕшĕ те алă ĕç тăваççĕ. Татьяна Федоровна алмаз тĕррипе аппаланма, çыхма кăмăллать. Çавăн пекех чечексене питĕ юратать. Çулла пахча тулли çитĕнтерет. 2023 çулта вĕсен хуçалăхĕ "Чи лайăх хушма хуçалăх" номинацинче мала тухнă. Ветеринари участокĕнче те чечек нумай. Килен-каяна картишĕнчи тĕрлĕ тĕслĕ çеçке илĕртет. Юрра -ташша маçтăр пулнăран Шăхачри "Умарина" ансамбле те çỹрет.

Надежда Ивановна та ĕçтешĕнчен пĕрре те кая мар. Çăм арламалла е тĕрлемелле пулсан никама та йăлăнмасть, хăйех пурнăçлать. Ăна та Турханти культура çуртĕнче курма пулать.

 Ача садне çỹрекенсемпе тата шкулта вĕренекенсемпе выльăх сиплевçисем тачă çыхăну тытаççĕ. Пĕчĕккисем ветеринари участокне час-часах килеççĕ. Татьяна Семеновăпа Надежда Лябукова вĕсене яланах ăшшăн кĕтсе илеççĕ, вăйăсем йĕркелеççĕ. Аслă Чементи пĕлỹ çуртĕнче 9 тата 11 класра ăс пухакансемпе ирттерекен тĕл пулусенче ветеринар профессийĕ пархатарлине, питĕ кирлине ăнлантарса параççĕ.

Ольга ПАВЛОВА