Патăрьелĕнчи Бизнес-инкубаторăн акт залĕнче Чăваш Республикин ял хуçалăх министерстви Патăрьел, Йĕпреç, Комсомольски, Елчĕк, Шăмăршă муниципалитет округĕсенчи территори пайĕсен специалисчĕсемпе, ветеринари ĕçченĕсемпе, фермер хуçалăхĕн ертỹçисемпе, выльăх-чĕрлĕх ĕрчетессипе вăй хуракан юридика сăпачĕсемпе ял хуçалăх выльăхне Федерацин патшалăх системин ветеринари облаçĕнчи "Хорриот" компонетра шута илесси тата маркăласси пирки канашлу ирттернĕ.

Мероприятие Патăрьел муниципалитет округĕн пуçлăхĕ Рудольф Селиванов уçнă. Вăл Юхмапа Пăла тăрăхĕн экономикипе, малăшлăхри аталану тĕллевĕсемпе паллаштарнă. Çавăн пекех выльăх-чĕрлĕхе маркăлассипе ветеринари ĕçченĕсемпе территори пайĕсен специалисчĕсене çине тăрса вăй хумаллине каланă.

Ял хуçалăх министрĕн çумĕ Ольга Егорова республикăра выльăхсене маркăлассипе, территори пайĕсен специалисчĕсем хуçалăх кĕнекине кăтартусене кĕртессипе пурнăçланă ĕçсемпе паллаштарнă.

 Чăваш Республикин Патшалăх ветеринари службин ертỹçи Александр Шакин сăмах илнĕ май сыснасене, ĕне-выльăха, лашасене, чăх-чĕпе маркăлассине палăртнă вăхăта вĕçлемелли, йĕркене пăхăнса пурнăçламалли пирки чарăнса тăнă.