Августăн 21-мĕшĕнче Чăваш Республикинче, çавăн пекех Патăрьел муниципалитет округĕнче те Пĕрлехи информаци кунĕ иртрĕ. Унăн тĕп темисем: вĕрентỹ учрежденийĕсенче çĕнĕ вĕренỹ çулне мĕнле хатĕрленни, газ оборудованийĕсемпе усă курнă чухне хăрушсăрлăх йĕркине пăхăнасси, техника тивĕçтерĕвне кирлĕ пек йĕркелесси, халăха МФЦ çăмăллăхĕпе туллин тивĕçтересси.

 Информушкăн йăлана кĕнĕ йĕркепе çынсене хăйсен ыйтăвĕпе те йышăнчĕ. Информаци кунне Патăрьел муниципалитет округĕн пуçлăхĕ Рудольф Селиванов, Чăваш Республикин Патшалăх Канашĕн депутачĕ Николай Степанов, муниципалитет округĕн администрацийĕн структура подразделенийĕсен ертỹçисем, территори пайĕсен начальникĕсем хутшăнчĕç.

Умра - çĕнĕ вĕренỹ çулĕ. Патăрьел муниципалитет округĕнчи шкулсенче 2024-2025 çулсенчи вĕренỹ çулталăкне мĕнлерех кăмăлпа тата хатĕрленсе кĕтсе илеççĕ-ши? Хăш ыйтусене татса пама май килеймен? Çак тата ытти ыйтусем пирки вĕрентỹ, çамрăксен политики, физкультура тата спорт управленийĕн начальникĕн çумĕ Николай Анисимов тухса калаçрĕ. Николай Николаевич Юхмапа Пăла тăрăхĕнчи шкулсем пурте Пĕлỹ кунĕнче алăксене уçса ачасемпе вĕрентекенскене йышăнма хатĕр пулнине палăртрĕ. Çакна маларах ку тĕлĕшпе вĕрентỹ учрежденийĕсенче тĕрĕслевпе çỹренĕ комисси членĕсем те çирĕплетнĕ. Классемпе ытти помещенисене кирлĕ пек хатĕрленĕ, террорла хăрушлăха сирмелли, пушар инкекĕнчен сыхланмалли хатĕрсем пурте йĕркеллĕ, кашни шкултах тата садикрах инкек пулнине систерекен кнопкăсем ĕçлеççĕ тата ытти те.

- Кăçалхи вĕренỹ çулĕнче муниципалитет округĕнчи шкулсене юсама вырăнти хыснаран 2150000 тенкĕ уйăрнă. Унпа туллин усă курнă. Сентябрĕн 1-мĕшĕ Ишлĕсемшĕн уйрăмах асра юлĕ, кунти шкул та реконструкци тунă хыççăн пĕлỹ тĕнчине ачасене йышăнĕ. Патăрьелĕнчи иккĕмĕш вăтам шкул çуртне капиталлă юсас ĕç те вĕçленсе пырать. Анчах та хăш-пĕр улшăнусем пирки ăна кăштах каярах уçма тивĕ. Ачасемпе вĕрентекенсем вăхăтлăха Патăрьелĕнчи пĕрремĕш вăтам шкулта вĕренме пуçлĕç.

Пикшикри вăтам шкул территорине те хăтлăх кỹреççĕ. Кунта спорт площадки, тренажер "хули" пулмалла. Урамри ĕçсем çĕнĕ вĕренỹ çулне пуçлама чăрмантармĕç. Пĕтĕмĕшле илсен ведомствăсем хушшинчи комисси 19 шкула, ача-пăчан 10 садикне, хушма пĕлỹ паракан 3 учреждение тĕрĕсленĕ. Вĕсенчен чылайăшĕнче шалти ĕçсене тирпейленĕ, территорисене хăтлăх кỹнĕ, санитарипе гигиена йĕркисене пăхăнса пысăк ĕçсем тунă. Вĕренỹ учрежденийĕсем çĕнĕ сезона пуçлама хатĕр,- терĕ Николай Николаевич хăйĕн докладне пĕтĕмлетсе.

Çывăх вăхăтрах патшалăх çурчĕсене, организацисене хутмалли хĕллехи тапхăр та пуçланать. Канашри "Газпром - газораспределение г. Чебоксары" акционерсен обществин Патăрьелĕнчи филиалĕн газ участокĕн начальникĕ Мансур Шамбазов инкек-синкекрен асăрханас, хăрушсăрлăх йĕркине пăхăнас тесен кашни çемье, çурт газпа тивĕçтерекен организаципе килĕшỹ тумаллине, пăрăхсене, газ çулĕсене кирлĕ пек пăхса тăмаллине, газ тухса тăнине сиссенех васкавлă пулăшу службине шăнкăравламаллине каларĕ.

 Кучухне çынсем МФЦ çăмăллăхĕпе питĕ нумай усă кураççĕ. Нумай функциллĕ центрăн районсем хушшинчи уйрăмĕн начальникĕн çумĕ Миляуше Хуснетдинова хăйĕн сăмахĕнче малашне те халăха тĕрлĕрен çăмăллăхпа тивĕçтерес ĕçе лайăхлатас, граждансем валли мĕн пур услови туса парас тĕллевпе ĕçленине палăртрĕ. Сăмах май каласан, кăçалхи çур çулта çеç центр урлă 11484 çыннăн ыйтăвне МФЦри "чỹречесем" урлă татса панă.

Информаци ушкăнĕ Патăрьелĕнчи МФЦпа, "Василек" ача садĕнче хĕле хатĕрленес тĕлĕшпе пурнăçлакан котельнăйри строительство ĕçĕпе, Шăнкăртамри пĕрремĕш вăтам шкул коллективĕ вĕренỹ çулне мĕнле хатĕрленнипе паллашрĕ.

 - Вăтам шкул коллективĕ, кунта вĕренекенсем, ашшĕ-амăшĕ те çĕнĕ вĕренỹ çулне пысăк кăмăлпа пуçлама хатĕр. Виçĕ çул каялла тĕпрен юсаса çĕнетнĕ шкулта тарăн пĕлỹ илме, сывлăха çирĕплетме, пур енлĕ аталанма мĕн пур услови çителĕклĕ. Шанас килет, çĕнĕ вĕренỹ çулĕнче те эпир пурте пĕр шухăшлă пулса çĕнĕ çитĕнỹсем сахал мар тăвăпăр,- çапла хавхаланса калаçрĕ 17 çул çак коллектива ертсе пыракан Чăваш тата Тутар Республикисен тава тивĕçлĕ учителĕ Гельсирень Абейдуллова директор.

Альбина ЕГОРОВА