Алманчăри куллен кирлĕ таварсем сутакан лавкка сентрисем яланах тулли. Вырăнта туса кăлараканнисене те мала хураççĕ кунта. Патăрьелĕнчи "Союз" пĕрлешỹ хатĕрлекен апат-çимĕç çеç 43 тĕрлĕ ассортиментпа сутăнать. Сентресем çинче типсе тăмаççĕ вĕсем. Çынсем кăмăлтан туянаççĕ.

 Алманчă лавкки унччентерех те халăх çỹрекен суту-илỹ çурчĕ пулнă. Кунта ĕçленĕ Лидия Еремеева заведующи (тивĕçлĕ канура халĕ) кашни çынпа шăкăлтатса çеç калаçса тăратчĕ. Çак ялта пурăнакансем çеç мар, Яманчỹрел трассипе каякан иртен-çỹрен те кирлĕ тавара туянма кĕретчĕ.

 Хăйĕн тараватлăхне, çаврăнăçулăхне, пултарулăхне Лидия Михайловна Гузель Азизовăна вĕрентсе хăварнă. Паянхи лавкка заведующийĕ наставникĕпе вунă çула яхăн пĕрле тăрăшнă. Халĕ Оксана Хадаровăпа ĕçлет Гузель Асхатовна (сăн ỹкерчĕкре сулахайри). Иккĕшĕ те пĕр сăмахра. Ĕçе кая юлса килесси çук пĕрин те. Апат-çимĕç таварĕсене халăх хăшне килĕштернине кура заказ параççĕ. Етĕрнере кăларакан кăлпассисене, "асанне" пельменĕсене, рулетсене, Елчĕкпе Комсомольскинче хатĕрлекен пылак шывсене сахал мар сутаççĕ. "Чăвашпотребсоюз" пĕрлешĕвĕн предприятийĕсен продукцийĕсене пĕрне те татăк тăратмаççĕ.

 Тавар туянаканпа пĕр шухăшлă пулни ĕçре ỹсĕм тума пулăшать те ĕнтĕ. Кам хăш çимĕçе туянма кăмăлланине те пĕлеççĕ сутуçăсем. Лавккара ĕçлекенсем çулленех Çĕнĕ çулта лотерея вылявĕ ирттереççĕ. Пĕлтĕр те 500 ытла билет сутнă вĕсем. Пурте вылявлă пулни килĕшет халăха.

Гузель Асхатовна суту-илỹ системинче 2003 çултанпа ĕçлет. Кзыл Чишмари вăтам шкултан вĕренсе тухса аттестат илнĕ хыççăн вăл Хусанти кооператив техникумне çул тытнă. Çăкăр пекарнинче технолог пулса ĕçлеме вĕренсе тухнăскер Патăрьелĕнчине ĕçе вырнаçнă. Качча тухсан вара тăван ялне куçнă. Ялĕнчи, Красномайскинчи лавккасенче ĕçлекен сутуçăсене черетпе канма янă. Унтан Алманча вырнаçса тĕпленнĕ.

Паянхи суту-илỹ çаврăнăшĕ пысăк. Вĕсем уйăхсерен умма лартнă тĕллевĕсене пурнăçласа пыраççĕ. Кăçал пĕлтĕрхинчен, ку уйăхра иртнинчен ытларах тавар сутаççĕ

. - Ĕçĕм килĕшет,- тет Патăрьел муниципалитет округĕнчи "Професси тĕлĕшпе чи лайăххисем" конкурсра çĕнтерсе "Чи лайăх суту-илỹ ĕçченĕ" ята тивĕçнĕ Гузель Азизова. - Ачаранах сутуçă пулма ĕмĕтленеттĕм. Хамăр урамри ватăсене пĕр енне савăт, тепĕр енне чул хурса тунă тарасапа иçĕм çырли, чернослив... виçсе парса сутаттăм. Ĕмĕтĕм пурнăçланчĕ. Ĕçĕм çынна юрăхлишĕн хĕпĕртетĕп. Муниципалитет округĕн администрацийĕн, "Чăвашпотребсоюз" правленийĕн Хисеп грамотисем те пур. Ĕçе пĕлсе йĕркелесе пырсан ăнăçу пулатех. Çурхи ака-суха ĕçĕсене вĕçленĕ хыççăн ирттерекен Акатуй-Сабантуя çулленех тухатпăр. Юбилейсем, ытти мероприятисем валли ятарласа тавара çỹретпĕр. Малашне те туянаканăн кăмăлне туллин тивĕçтересчĕ.

 Альбина АСТРАХАНЦЕВА