РФ ШĔМĕн "Батыревский" РЭО ГИБДД уйрăмĕ транспорт хатĕрне çул-йĕр юхăмне хутшăнма пур енлĕн хатĕрлекен ятарлă подразделени шутланать. Унăн тĕп тĕллевĕ - автомобильсене регистрацилесси, шута илесси, патшалăх номерĕсене парасси, çавăн пекех экзаменсем йышăнасси, водитель удостоверенийĕсене йĕркелесси тата парасси.

 Юлашки çулсенче Юхмапа Пăла тăрăхĕнче транспорт куçăмĕ палăрмаллах ỹсрĕ. Çакă, паллах çынсем техникăпа, транспорт çăмăллăхĕпе нумай усă курнине, çав вăхăтрах ялта çынсем начар мар тупăш ĕçлесе илме пултарнине те çирĕплетет. Çапах та кирек мĕнле транспортпа çỹрекенĕн те йĕркене, çул çинчи правилăна çирĕп пăхăнмалла. Регистраци уйрăмĕн сотрудникĕсем те хăйсен яваплă ĕçне пахалăхлă пурнăçлама, çĕнĕлĕхсене халăх патне çитерсех тăма тăрăшаççĕ. Акă мĕн пĕлтерчĕ кĕскен служба ĕçĕ пирки РФ ШĔМĕн "Батыревский" РЭО ГИБДД уйрăмĕн начальникĕ, полици майорĕ Николай Сугутский: -

Кăçалхи çичĕ уйăхра патшалăх çăмăллăхĕ пама 7383 заявлени (иртнĕ çулхи çак вăхăтра 6175) кĕнĕ. Вĕсенчен регистраципе 6111 (пĕлтĕр 5035), водитель удостоверенийĕпе 1272 (1140). Мĕн пурĕ граждансен ыйтăвне тивĕçтерсе 5225 (5058) çăмăллăх панă, 4492 (4113) транспорта регистрациленĕ, 1033 çын экзамен тытнă. Электронлă майпа патшалăх çăмăллăхĕпе усă курас текенсем 4020 çын (61,1 процент) пулнă.

 Асăннă тапхăрта водитель удостоверенийĕн срокĕ тухнипе е тата ăна çухатнипе 634 çыннăн ыйтăвне тивĕçтернĕ. Вăл шутра МФЦ урлă 196 (30 процент) ĕç.

Альбина ЕГОРОВА