2024 çулхи сентябрĕн 5-мĕшĕнче СССР летчик-космонавчĕ, икĕ хутчен Совет Союзĕн Геройĕ, авиацин генерал-майорĕ, Сĕнтĕрвăрри муниципалитет округĕнчи Шуршăлта çуралса ỹснĕ Андриян Григорьевич Николаев çуралнăранпа 95 çул çитет. 1962 çулхи августăн 11-мĕшĕнче пĕрремĕш хут тĕнче уçлăхне парăнтарнă чăваш ачин ячĕпе сумĕ ĕмĕр-ĕмĕр халăхра упранĕ. Акă мĕнле аса илчĕ çак куна Тури Туçари хисеплĕ ĕç ветеранĕ, Чăваш Республикин тава тивĕçлĕ экономисчĕ, тăван кил-çурт таврашĕнче Шуршăлти космонавтика музейĕн филиалне уçма мехел çитернĕ хастар Валерий Салмин:

- Çак кун маншăн ĕмĕрлĕхе асра юлчĕ. Ун чухне эпĕ Туçари вăтам шкулта 9 класра вĕренеттĕм. Чăваш ачи Андриан Николаев "Восток-3" караппа космоса вĕçни мана питĕ тыткăнларĕ. Çавăн чухне чунра космонавт пулас ĕмĕт çуралнăччĕ... Анчах шел, пурнăçра шăпа урăхла çаврăнса тухрĕ. Тепĕр самант та асрах. Тĕнче уçлăхĕнчен ăнăçлă çаврăнса килнĕ хыççăн çамрăк космонавт кĕркунне, хуçалăхра шăпах уй-хир ĕçĕсем вăй илсе пынă тапхăрта республикăра кăтартуллă ĕçлекен "Гвардеец" колхоза курма килчĕ. Çав вăхăтра шăпах пысăк хуçалăха Михаил Долгов (1959-1968 çулсенче председатель пулнă) ертсе пыратчĕ. Ватти-вĕтти хире космонавта курма чупрăмăр.

 Сăмах май каласан, 2015 çулта хамăн тăван кил-çурт таврашĕнче уçнă космонавтика музейĕн пĕр пайĕ шăпах тĕнче уçлăхĕпе, космонавтика аталанăвĕпе çыхăннă. Андриан Николаев пĕрремĕш хут тĕнче уçлăхне çĕкленнĕ хыççăн пирĕн тăрăха килсе кайнă сăн ỹкерчĕксем те кунтах сумлă вырăн тупнă.

Альбина НИКОЛАЕВА