Патăрьелĕнчи пĕрремĕш вăтам шкулта Украинăри ятарлă çар операцинче неонацистсене хирĕç кĕрешсе пуçне хунă, пĕлỹ çуртĕнче физкультура урокĕсене ертсе пынă Андрей Владимиров вĕрентекен тата Дмитрий Егоров выпускник ячĕпе Асăну хăмисем тата Паттăр парттисене уçнă.

Мероприятие Патăрьел муниципалитет округĕн администрацийĕн вĕрентỹ, çамрăксен политики, физкультура тата спорт управленийĕн начальникĕ Ирина Рубцова, Патăрьел территори пайĕн начальникĕ Андрей Румянцев, паттăрсен ашшĕ-амăшĕ тата çывăх çыннисем - Тамара Иванова, Светлана Егорова, Людмилăпа Николай Владимировсем тата Андрей Владимировăн мăшăрĕ Анна Александровна - хутшăннă.

- Андрей мĕн ачаран çар çынни пулма ĕмĕтленетчĕ. Украинăра ятарлă çар операцийĕ пуçлансан унта тухса кайрĕ. Пире мирлĕ тỹпе парнелессишĕн хăйĕн пурнăçне шеллемерĕ... - тенĕ Людмила Владимирова сăмах илнĕ май чунĕнчи хурлăха, куçĕнчи куççуле пытараймасăр.

Кашни ир малашне Патăрьелĕнчи пĕрремĕш вăтам шкулта вĕренекенсене виçĕ паттăр - Игорь Иванов, Дмитрий Егоров тата вĕсен юратнă вĕрентекенĕ пулнă Андрей Владимиров - кĕтсе илĕç.

 Ольга БЕЛЬДЕКОВА