"Культура" наци проекчĕпе килĕшỹллĕн республикăна 8 автоклуб килнĕ. 2023 çулта унпа Элĕк, Çĕрпỹ, Çĕмĕрле, кăçал Йĕпреç, Муркаш, Вăрмар, Етĕрне, Тăвай муниципалитет округĕсене тивĕçтернĕ. Канаш муниципалитет округĕнчине 2010 çулта, Патăрьелĕнчине 2015 çулта туяннă.

2024 çулта Чăваш Ен муниципалитечĕсене тата 4 автоклуб çитĕ.

Кăçал 10 автоклуб республикăри ялсене 156 хутчен тухса çỹренĕ. Культура ĕçченĕсен пултарулăхне 23,6 пин çын курса савăннă.

Патăрьел муниципалитет округĕнче çуллахи вăхăтра автоклуб культурăллă-массăллă 11 мероприяти ирттерес ĕçе хутшăннă. Кунта район центрĕнчен аякри, сахал йышпа пурăнакан ялсене те шута илнĕ.

 Концертсене 11800 çын пырса курнă. Шăнкăртам, Тăрăн, Турхан территори пайĕсенче ял уявĕсене ирттерме хутшăннă. Çемье çулталăкне халалласа Ачасене хỹтĕлемелли кун çитĕнекен ăру валли "Телейлĕ çемье" уяв йĕркеленĕ. Шкулти çуллахи лагерьсене уçнă май "Хĕвел, сывлăш, шыв - пирĕн çывăх туссем" мероприяти ирттернĕ. Муниципалитет округĕнчи ачасен 19-мĕш, аслисен 72-мĕш Акатуй-Сабантуйĕсене хутшăннă. "Раççей çăлкуçĕсем - Чăваш Ен çăлкуçĕсем" экофестивальте пулнă. "Пыл сăпасĕ - уяв сехечĕ", "Панулми сăпасĕ пире çимĕç кỹчĕ" концерт программисемпе халăх умне тухнă. Вĕсене ял халăхĕсĕр пуçне хăнасем те курса киленнĕ. Концертсенче культурăпа кану ĕçченĕсемсĕр пуçне чăваш эстрада артисчĕсем (Валентина Волкова, Алексей Московский, Валерий Димитриев) пулнă.

Автоклуба халăх чăннипех те кĕтет. Аякра пурăнакан ялсенче артистсене кăмăлтан йышăнаççĕ. Вĕсемпе пĕрле юрлаççĕ. Юрăçсем те хавас çакăншăн. Вĕсене тăвăллăн алă çупни хавхалану кỹрет.

Альбина ИВАНОВА