СЕНТЯБРĔН 13-15-мĕшĕсенче "Жемчужина Чувашии" санаторипе сывату комплексĕнче ачасемпе çамрăксен медиапроекчĕсен регионсен хушшинчи "МедиаВзлет" фестивалĕ иртнĕ. Чăваш Енри Цифра министерстви йĕркеленĕ Раççейри форума 250 çамрăк журналист (9 -17 çулсенчи ачасем) хутшăннă. Унта пулас журналистсем хăйсен пĕлĕвĕпе, опычĕпе, медиапроекчĕсемпе паллаштарнă, теорие вĕреннĕ.

Фестивальте Патăрьелĕнчи пĕрремĕш вăтам шкулти "ТелеШкола" ушкăн харăсах икĕ номинаципе - "с места событий", "лучшая операторская работа" - палăрса виççĕмĕш вырăнсене çĕнсе илнĕ. Команда чысне Анастасия Прискина тата Амира Купкенова хỹтĕленĕ. Творчество ушкăнне ертсе пыраканĕ - Алсу Шрша. Сăмах май каласан, асăннă шкулти çамрăк журналистсем округра иртекен "Акатуй-Сабантуйра", ытти культура мероприятийĕсенче те хăйсен опычĕпе çамрăксене паллаштараççĕ.