Кивĕ Ахпỹртре физкультура учитель-ветеранĕсен Геннадийпе Петр Рыбкинсен парнисене çĕнсе илессишĕн çăмăл атлетикăпа йăлана кĕнĕ республика ăмăртăвĕ иртнĕ. Унта хутшăнакансене Патăрьел муниципалитет администрацийĕн вĕрентỹ, çамрăксен политики, физкультура тата спорт управленийĕн начальникĕ Ирина Рубцова, тĕнче класлă СССР спорт мастерĕ Фаина Краснова, çак ялти СВО участникĕ Георгий Куделин тата ытти хăнасем саламланă.

Ăмăртăва республикăри Шăмăршă, Патăрьел, Етĕрне муниципалитет округĕсенчи 80 ытла спортсмен хутшăннă.

Харкам-хăйшĕн чупассипе Патăрьелĕнчи пĕрремĕш, Туçари, Первомайскинчи, Аслă Чементи, Турханти, Карапай Шăмăршăри, Етĕрнери шкулсенчи çăмăл атлетсем çĕнтерỹçĕсемпе призерсем пулнă.

Командăпа вара Патăрьелĕнчи пĕрремĕш вăтам шкул пĕрремĕш, Аслă Чеменсем иккĕмĕш, Туçасем виççĕмĕш вырăнсене йышăннă.

Çĕнтерỹçĕсемпе призерсене ăмăртăва йĕркелекенсем дипломсемпе, медальсемпе тата асăнмалăх парнесемпе чысланă.

Альбина ИВАНОВА