Сентябрĕн 18-мĕшĕнче республикăра, çавăн пекех Патăрьел муниципалитет округĕнче те Пĕрлехи информаци кунĕиртрĕ.

Унăн ĕçне Патăрьел муниципалитет округĕн пуçлăхĕ Рудольф Селиванов, Чăваш Республикин Патшалăх Канашĕн депутачĕ Валерий Антонов, администрацин структура подразделенийĕсен ертỹçисем, территори пайĕсен начальникĕсем, банк, шут ĕçченĕсем, харпăр-хăй ĕçĕпе тимлекенсем тата ыттисем те хутшăнчĕç.

 Вĕсем 2025 çулхи январĕн 1-мĕшĕнчен вăя кĕрекен налук саккунĕнчи улшăнусем, перекет банкĕсен халăхпа ĕçлемелли нумай çуллăха тăсăлакан перекет программисем пирки калаçрĕç.

Информаци кунне хутшăннисен умĕнче чăн малтанах Патăрьел муниципалитет округĕн пуçлăхĕн çумĕ, экономика, ял хуçалăх, инвестици ĕçĕ-хĕлĕн пай пуçлăхĕ Юлия Селиванова Юхмапа Пăла тăрăхĕнчи уй-хир ĕçĕсене пĕтĕмлетрĕ. Асăннă кун тĕлне пĕрчĕллĕ тата пăрçа йышши культурăсене пĕтĕмпех пуçтарса кĕртнĕ. Мĕн пурĕ 46700 тонна тырă çапса илнĕ, вăтам тухăç гектартан 29,4 центнерпа танлашнă. Хальхи вăхăтра ял хуçалăх предприятийĕсенче çĕрулми кăларас ĕç вăй илсе пырать. Унăн вăтам тухăçĕ гектартан 290 центнер. Хуçалăхсенче куккурус, хĕвел çаврăнăш, рапс пуçтарса илмелли юлнă.

Налук - федераци, регион, вырăнти бюджета кĕрекен обязательнăй тỹлев. Тĕрлĕ йышши налука пурте тỹлеççĕ: юридика пĕлтерĕшлĕ çынсем те, предпринимательсем, хуçалăхсем, организаци-предприятисем, уйрăм çынсем, пенсионерсем те. 2025 çулхи январĕн 1-мĕшĕнчен налук тытăмĕнче çĕнĕлĕхсем пулаççĕ. РФ налук службин Чăваш Енри районсем хушшинчи 4-мĕш номерлĕ инспекцийĕн камераллă тĕрĕслев уйрăмĕн начальникĕн çумĕ Надежда Поликарпова çĕнĕ çултан вăя кĕрекен улшăнусем пирки тĕплĕн ăнлантарса пачĕ, ыйтусене хуравларĕ.

 - Налук саккунĕнчи çĕнĕлĕхсене пĕлменни, çавна май ăна вăхăтра тата кирлĕ пек тỹлеменни никама та çăмăллăх памĕ. Çавăнпа та налук реформине Патăрьел муниципалитет округĕнчи кашни ĕç коллективĕ, предпринимательсем, фермерсем, уйрăм граждансем те кирлĕ пек йышăнса саккуна çирĕп пăхăнмалла. Патшалăх, муниципалитет округĕн бюджечĕ пуян пулсан халăхăн пурнăç шайне ỹстерме, ялсене çĕнетме май пулĕ,- терĕ Патăрьел муниципалитет округĕн пуçлăхĕ Рудольф Селиванов пире кĕтекен çĕнĕлĕхсем пирки калаçăва пĕтĕмлетсе.

Информаци кунĕнчех Перекет банкĕнче тата "Газпромбанкра" клиентсене укçа-тенкĕне пухма усăллă та шанчăклă пултăр тесе мĕнле майсем пулнипе вĕсен представителĕсем Анастасия Тимофеева тата Галина Потапова паллаштарчĕç.

Юлашкинчен Рудольф Селивановпа Валерий Антонов округри çамрăк çемьесене патшалăх программипе килĕшỹллĕн çурт-йĕр çавăрма пулăшма свидетельствăсемпе сертификатсем пачĕç.

Альбина ЕГОРОВА