КĂÇАЛХИ авăн уйăхĕнче пушар сăлтавĕпе пăшăрханмалли çине-çинех пулчĕ. Патăрьел муниципалитет округĕнчи пушар надзорĕн начальникĕ Андрей Тукмаков хаçат редакцине пĕлтернĕ тăрăх, сентябрьте çеç "01" служба машинисем 10 хутчен инкек пулнă вырăна васкавлăн тухса кайнă! Çулталăк пуçланнăранпа мĕн пурĕ вут-çулăм сиен тунипе çыхăннă 44 тĕслĕхе шута илнĕ.

Сентябрĕн 30-мĕшĕнче Çĕнĕ Ахпỹртри Скворцовсен сарай çумĕнчи йывăç хуралтăран тухнă пушарта хуçалăхĕ çеç мар, 15 тонна севокĕ те çунса кайнă. Ыр кăмăллă çынсем паян вĕсене май пур таран пулăшаççĕ. Сăмах май каласан, Çĕнĕ Ахпỹрт территори пайĕнче кăçал тăватă пушар пулнă. Пĕр кун маларах Аслă Чементе те кил-çурт таврашĕ çуннă. Сăлтавĕсем иккĕшин те электричество пăралукĕсем шанчăклă пулманни. Вăтаелĕнчи хуçалăхра сиксе тухнă инкек вара мунча хутнă чухне кăмакине çав тери хĕрỹ тунипе çыхăннă. Телее, ăна алхасма паман, çийĕнчех сỹнтернĕ.