ЮПА уйăхĕнче мăшăрпа 50, 55 çул пĕрле килĕштерсе пурăнакан хисеплĕ вунă çемье ылтăн тата изумруд туйĕсене паллă тăваççĕ. Турханти Алексей тата Светлана Алексеевсем, Григорийпе Василиса Осиповсем, Шăнкăртамри Месгутпа Рушания Калайбашевсемпе Шамильпе Гелдаза Сулеймановсем, Вăтаелĕнчи Юрийпе Нина Виноградовсем, Первомайскинчи Иванпа Раиса Киргизовсем çемье чăмăртанăранпа çак уйăхра çур ĕмĕр пулать. Вĕсем пурте ĕç ветеранĕсем, ял-йышра ятлă-сумлă мăшăр.

Шăнкăртамри Арифуллапа Фидания Муксеевсемпе Фейзуллапа Минзифа Тазюковсем, Вăрманхĕрри Шăхалĕнчи Николайпа Фаина Васильевсем, Тутар Сăкăтĕнчи Миндинпа Хальберия Шарафутдиновсем пĕр сукмакпа утма пикенни тата ытларах. Вĕсем 55 çул мăшăр кăвакарчăнсем пек килĕштерсе пурăнаççĕ. Патăрьел муниципалитет округĕнчи ЗАГС пайĕ ырă йăлана малалла тăсса вĕсене пурне те туй юбилейĕсемпе саламлать, малашнехи пурнăçра та çамрăксемшĕн тĕслĕх пулма ырă сунать.