Муниципалитет округĕнче вĕрентекенсене професси уявĕпе чысларĕç. Çак ятпа вĕсене муниципалитет округĕн пуçлăхĕ Рудольф Селиванов, администрацин вĕрентỹ, çамрăксен политики, физкультурăпа спорт управленийĕн начальникĕ Ирина Рубцова, профсоюз райкомĕн председателĕ Светлана Елагина саламларĕç.

Уяв Патăрьелĕнчи пĕрремĕш вăтам шкулти "Арабеск" ушкăн "Чăваш илемĕ" ташшинчен пуçланчĕ.

 Рудольф Васильевич педагогсене саламланă май шăпах çак сферăри ĕçченсем ачасемпе çамрăксене пĕлỹ, воспитани, хăнăху парас ĕçре тĕп вырăн йышăннине палăртрĕ. Вĕрентекенсене ăшăлăхшăн, чăтăмлăхшăн, ырăлăхшăн, профессие парăннăшăн, ĕçри йăла-йĕркене тытса пынăшăн тав турĕ. Телей, сывлăх, ăнăçу, çĕнĕ ỹсĕмсем сунчĕ.

Муниципалитет округĕнчи вĕрентỹ системинче 400 ытла педагог ĕçлет. Вĕсенчен 65-шĕ Чăваш Республикин, 8-шĕ Раççей Федерацийĕн тава тивĕçлĕ учителĕ ята тивĕçнĕ. Кăçалхи вĕренỹ çулĕнче çитĕнекен ăрăва вĕрентсе воспитани пама 4 çамрăк педагог ĕçе пуçăннă.

 Официаллă салам чыславпа черетленчĕ. Тăрăшуллă педагогсене, вĕрентỹ организацийĕсен ĕçченĕсене тĕрлĕ шайри Хисеп хучĕсемпе, дипломсемпе наградăларĕç.

Патăрьелĕнчи ачасен ăсталăх шкулĕн "Радуга" ансамблĕ, пĕрремĕш вăтам шкул вĕренекенĕсем, Шăнкăртамри пĕрремĕш вăтам шкулта пĕлỹ пухакансемпе педагогсем юрă-ташăпа уяв сĕмне хăпартрĕç.

Альбина ИВАНОВА