Патăрьелĕнчи "Паттăр" стадионта Украинăри ятарлă çар операцине хутшăнакансен ячĕпе çăмăл атлетсен эстафети иртрĕ. Старта тăракансем çапла майпа мирлĕ тỹпешĕн кĕрешекенсене тĕрев панине кăтартса пачĕç.

Мероприятие Патăрьел муниципалитет пуçлăхĕ Рудольф Селиванов уçрĕ. Вăл халăх кар тăрсан çеç тăшмана çĕнтерме май пулнине, неонацистсемпе кĕрешекенсене тылран пулăшу кирлине палăртса хăварчĕ.

Спортсменсене саламланă çĕре Патăрьел тата Шăмăршă районĕсен çар комиссарĕ Вячеслав Илюткин, "Паттăр" спорт шкулĕн директорĕ Анатолий Афанасьев, "Тăван çĕршыв хỹтĕлевçисем" патшалăх фончĕн Чăваш Енри филиалĕн Патăрьел округĕнчи социаллă координаторĕ Алена Петрова, Украинăри ятарлă çар операцине хутшăнакан Виталий Нягин хутшăнчĕç.

Эстафета ача садне çỹрекенсем старта тăнипе пуçланчĕ. 6 команда хушшинче иртнĕ тупăшу питĕ кăсăклă пулчĕ. Пĕчĕккисене хавхалантарса ашшĕ-амăшĕ те, воспитательсем те юнашарах чупрĕç. Патăрьелĕнчи "Утмăлтурат" ача садне çỹрекенсем чи маттуррисем пулчĕç. Финиша вĕсем хыççăн Патăрьелĕнчи "Юмах" садăн воспитанникĕсем, Туçари "Сар хĕвел" ачисем кĕчĕç.

Кĕçĕн класра вĕренекенсем те хăйсен пултарулăхне туллин кăтартрĕç. Старта 12 шкул команди тăчĕ. Патăрьелĕнчи пĕрремĕш вăтам шкул вĕренекенĕсем пьедесталăн чи çỹллĕ картлаçĕ çине тăма тивĕçрĕç. Нăрваш Шăхалĕнчи пĕлỹ çуртĕнче ăс пухакансем - иккĕмĕш, Феизов ячĕллĕ Шăнкăртамри вĕрентỹ учрежденинчи хĕр ачасемпе арçын ачасем виççĕмĕш вырăна тухрĕç.

Старта тăнă хĕрарăмсем те сывă пурнăçпа туслине кăтартса пачĕç. Эстафетăна тăнисенчен кашнийĕн 400 метра парăнтарма тиврĕ.

Патăрьелĕнчи "Юмах" тата "Утмăлтурат" ача садĕнче ĕçлекенсем пĕрремĕш тата иккĕмĕш йышăнчĕç. Первомайскинчи "Шуçăм" тата Сăкăтри "Çăлкуç" ача сачĕсенче вăй хуракансем виççĕмĕш вырăна пайларĕç. Патăрьелĕнчи культурăпа кану центрĕнче ĕçлекенсемпе территори пайĕн начальникĕсем хушшинчи ăмăртăва та пăхма кăсăклă пулчĕ.

Культура сферинче тăрăшакансем юрă-ташăра кăна мар, спортра та маттуррине кăтартса пачĕç.

Шкулта вăй хуракансенчен йĕркеленĕ командăсенчен Туçасем - пĕрремĕш, Патăрьелĕнчи пĕрремĕш вăтам шкул - иккĕмĕш, Сăкăтсем виççĕмĕш тухрĕç.

Тĕп ушкăнрисенчен муниципалитетри халăха социаллă хỹтлĕх паракан центрпа халăха ĕçпе тивĕçтерекен центрăн пĕрлештернĕ команди эстафетăра чи маттурри пулнине кăтартса пачĕ. Патăрьелĕнчи тĕп больницăра вăй хуракансем те пьедесталăн иккĕмĕш картлаçĕ çине тăчĕç. Шкулта вĕренекенсен хутăш командинче тăватă каччăпа тăватă хĕр старта тăчĕç. Ăмăрту питĕ хĕрỹ иртрĕ, анчах Митта Ваçлейĕ ячĕллĕ Первомайскинчи пĕлỹ çуртĕнче ăс пухакансене çитекен пулмарĕ. Патăрьелĕнчи пĕрремĕш вăтам шкул команди - иккĕмĕш, Турхансем виççĕмĕш йышăнчĕç. Çĕнтерỹçĕсене дипломсемпе, медальсемпе тата кубоксемпе хавхалантарчĕç.

Эстафета вăхăтĕнчех çар операцинчи салтаксем валли гуманитари пулăшăвĕ пухассине йĕркеленĕ. Кашнийĕ унта ыр кăмăллăхпа палăрма пултарчĕ.

Ольга ПАВЛОВА