Эпир виçĕ çул каялла Патăрьелĕнчи футболистсен "БТВ" командине тĕрев пама шут тытрăмăр. Пирĕн шухăша муниципалитет округĕн пуçлăхĕ Рудольф Селиванов, Чăваш Республикин Патшалăх Канашĕн депутачĕ Валерий Антонов, Аркадий Мордяковпа Константин Хлебников тренерсем те ырларĕç.

Пурте пĕрле тăрăшса футбол командин аталану çул-йĕрне палăртрăмăр. Администраци вăйăсем вылямашкăн вырăн парать. Эпир, Антоновсем, тумсемпе тивĕçтеретпĕр, взноссене тỹлетпĕр. Тренерсем вăйăсене йĕркелесе пыраççĕ.

 Тăрăшни çĕре ỹкмерĕ. Пĕлтĕр Юхмапа Пăла тăрăхĕн команди иккĕмĕш вырăна тухрĕ республикăра. Кăçалхи турнир 7 уйăха пычĕ. Команда кашни эрнерех ытти ушкăнсемпе тĕл пулса выляса çĕнтерсе пычĕ. Пĕрлĕхре вăй пулнине чемпионат та кăтартрĕ. Патăрьелĕнчи "БТВ" команда финала тухса Шупашкарти Олимп стадионĕнче Çĕмĕрлесен спорт шкулĕн "Авто-профи" командипе тĕл пулса выляса çĕнтерỹçĕ пулчĕ. Республика чемпионĕсене Чăваш Енри футбол федерацийĕн президенчĕ Борис Борисов саламларĕ. Команда кубока тивĕçрĕ, вылякансем - медальсене.

Паллах, çак çитĕнỹ çăмăлпа килмерĕ. Вăл пĕрлехи вăйпа туптанчĕ. Çавна май хамăра пулăшнисене, вăйăсене курма çỹренисене пурне те пысăк ТАВ.

 Василий АНТОНОВ, команда ертỹçи