ВАТТИСЕМ хăвна чулпа перекене те çăкăр чĕллипе пер тенĕ. Усала усалпа тавăрни пурнăçра та ырă пулăм патне илсе пымастех. Çапах та чуна ыраттаракан тĕслĕхсем тĕл пулаççĕ-ха. Акă, иртнĕ çул Юхмапа Пăла тăрăхĕнче шута илнĕ пушарсенчен иккĕшĕ пĕр çын теприне вут тĕртнипе, урăхла каласан ятарласа пушар туса унăн пурлăхне юрăхсăра кăларнипе çыхăннă. Паллах, çак ĕçпе йĕрке хуралçисем ĕçлеççĕ. Муниципалитет округĕнче виçĕмçул та кун пек пĕр тĕслĕх пулнăччĕ. Хальхи вăхăтра пурнăçа тĕрлĕрен сыпăнтарса пыракан пур. Кирек мĕнле пулсан та кил хуçисем çурт-йĕр хăтлăхĕшĕн вăй хумасăр, тар тăкмасăр пулмасть. Çав вăхăтрах ял çынни теприне сăтăр тăвас тĕллевпе шар кăтартнине мĕнле ăнланмалла-ха? Усал туни пурнăçра ырăпа таврăнманни те паллă.