ВУТ-КĂВАРПА пулакан инкек-синкек чылай чухне хамăртанах килет. Патăрьелĕнчи пушар надзорĕнчен пĕлтернĕ тăрăх, çак кунсенче тăватă пушара шута илнĕ. Патăрьелĕнчи уйрăм гаражра электропроводка юсавсăррипе тата пĕр пурăнман çуртра вут-çулăм алхасма пикеннĕ. Татмăшра вара мунча хутнă чухне асăрханусăр пулнăран чутах пысăк инкек пулман. Вут-кăвар шăранса пĕтсе сỹнмесĕрех хуçисем кĕле витре çине пуçтарса илнĕ те мунча алкумне лартса хăварнă. Кайран вара ун пирки мансах кайнă. Кăвар амаланса хыпса илнĕ. Юрать-ха, тĕтĕме вăхăтра асăрханă, çулăма пушарниксем алхасма паман.

Çĕнĕ Ахпỹртри пĕр пуçтах вара республикăра пушар хăрушлăхĕн йĕркипе çирĕп пăхăнмалли ятарлă тапхăр пулнине шута илмесĕрех хăйĕн хирти ани çинчи хыт-хурана, пĕлтĕрхи типĕ курăка çунтарса тасатма шут тытнă, тавралăха вараласа тĕтĕм-сĕрĕм йăсăрлантарнă. Пушар надзорĕн сотрудникĕсем саккунпа килĕшỹллĕн гражданина çакăншăн протокол çырнă, 5 пин тенкĕ штраф панă.