Ялсенчи урамсенче ирĕккĕн чупса çӳрекен хуçасăр йытăсене час-часах куратпăр-ха. Паллах, вĕсем пуриншĕн те хăрушлăх кăларса тăратаççĕ. Ваттисем калашле, йыттăн хӳри кукăр, чупса пынă чухне те çыртса илме пултарать. Юлашки вăхăтра ялсенче урнă тилĕсем час-час курăнни хăрушлăха тата пысăклатать. Çак кунсенче çеç редакцине Кивĕ Ахпӳртрен, Туçаран тилĕ хушма хуçалăхри хур-кăвакала, чăхсене тытса çини пирки пăлханса шăнкăравларĕç. Маларах Тутар Сăкăтĕнче те урамсенче тилĕ хуçаланни пирки пĕлтернĕччĕ. Инкек куçа курăнса килмест, паллах. Çапах тискер чĕр чунсене ялта хуçа пулма чармалли пирки шутламаллах.