ЮЛАШКИ уяр кунсенче территори пайĕсенчи чылай ялта кĕрхи субботниксем йĕркелеççĕ, масар таврашне хăтлăх кÿреççĕ, йывăçсем лартаççĕ тата ытти те. Паллах, тирпейленĕ территорисем кăмăла уçаççĕ. Хыт-хура пусса кайнă е унта та кунта çум курăк ашкăракан вырăнсем, кантур, учреждени умĕсем те тÿрех куçа тирĕнеççĕ. Вĕсене йĕркене кĕртме вара пысăк укçа-тенкĕ мар, пуçарулăх, кăмăл çеç кирлĕ.

Округри ялсенче хута кайса пыракан ФАПсем, клуб учрежденийĕсем, шкулсем умĕсенче е таврашĕнче, паян чăнах та тирпейĕ те, илемĕ те, хăтлăхĕ те пур. Вĕсенче йывăç-курăкне, çеçкине те çитĕнтерççĕ. Çав вăхăтрах хăш-пĕр ĕç коллективĕсен кантур умĕнчен иртсе кайма та кăмăллă мар. Черетлĕ планеркăра Патăрьел муниципалитет округĕн пуçлăхĕ Рудольф Селиванов çакна пурин те шута илмеллине, тăван тавралăх илемĕшĕн пурин те тăрăшмаллине çивĕчлетрĕ.