Патăрьел муниципалитет округĕн пуçлăхĕ Рудольф Селиванов Чăваш Ен делегацийĕпе пĕрле Мускаври «Ылтăн кĕркунне» агропромышленность куравне хутшăнчĕ.

«Республика стендне хăйсен продукцине регионтан 25 ытла предприятипе организаци тăратнă. Патăрьелсем аш-какай деликатесĕсене, сыр продукцине, чипсы тата сухан-севок вырнаçтарнă. Вĕсене туса илессипе эпир республикăра çеç мар, çĕршывĕпех пуçаруçăсем шутланатпăр.

Куравăн тĕп теми кăçал агропромышленность комплексне туллин аталантарасси пулчĕ. Пирĕн ĕç программи пуян:

ÿсен-тăран тата аграри аталанăвĕ енĕпе пленарлă лару, вуншар çавра сĕтел тата панельлĕ дискуссисем.

«Ылтăн кĕркунне» вăл пирĕншĕн туса илекен продукцие уççăн кăтартасси, малта пыракан опыта вĕренесси, ĕçлĕ çыхăнусем йĕркелесси»,— тет Рудольф Селиванов.