ИРТНĔ шăматкун Нăрваш Шăхалĕнчи пĕр хуçалăхра пушар тухнă. Кăçал çак ял тăрăхĕнче çеç тăваттăмĕш хут вутпа куçа-куçăн кĕрешме тивнĕ.

Хальхинче ирхине 10 сехетре кил хуçи лаçра выльăх апачĕ хатĕрлеме пикеннĕ. Анчах асăрханса ĕлкĕреймен курăнать, хăй унталла-кунталла çỹренĕ вăхăтра вут-кăвар сиксе ỹксе малтан лаççине, унтан мунчине сиенленĕ. Юрать-ха ăна малалла çунма паман, пỹрт-çуртне те сыхласа хăварнă.

Ялсенче чылайăшĕ хур-кăвакал, ытти выльăх-чĕрлĕх валли çапла апата пĕçерсе çитерет. Кĕр мăнтăрĕпе пуçтарнă ытлашши çимĕçе вырнаçтармалла-çке. Çавăнпа та пушар хăрушсăрлăх йĕркине пурин те çирĕп пăхăнмалла. Çунакан кăмакана тимлĕхсĕр пăрахса хăвармалла мар.