2019 çулхи ака уйăхĕн 13-мĕшĕнче И.Н. Ульянов ячĕллĕ Чăваш патшалăх университетĕнче шкул ачисемпе студентсем хушшинче чăваш чĕлхипе тата литературипе пĕтĕм тĕнчери виççĕмĕш олимпиада иртрĕ. Олимпиадăна Раççейрен тата ун тулашĕнчен 400 ытла шкул ачипе студент хутшăнчĕ.

       Олимпиадăна чăваш чĕлхипе литературине вĕренес туртăма ӳстерес, тăван культурăпа историе упрас, хисеплес тата вĕренекенсен пултарулăхне аталантарас тĕллевпе йĕркеленĕ.

       Олимпиадăра икĕ енпе ăмăртрĕç: «Чăваш чĕлхи – тăван чĕлхе» тата «Чăваш чĕлхин илемĕ».

      «Чăваш чĕлхи – тăван чĕлхе» олимпиадăна 2018 тата 2019 çулсенче регионсенчи шкул ачисем хушшинче чăваш чĕлхипе тата литературипе иртнĕ олимпиадăн 57 çĕнтерӳçипе призерĕ хутшăнчĕ.

       «Чăваш чĕлхин илемĕ» олимпиада онлайн формăпа И.Н. Ульянов ячĕллĕ Чăваш патшалăх университечĕн дистанциллĕ вĕренмелли Мoodle системинче иртрĕ, унта Чăваш, Тутар, Пушкăрт Республикисенчен, Чĕмпĕр облаçĕнчен, Казахстанран тата Туркменистанран 355 вĕренекен хутшăнчĕ.

       «Чăваш чĕлхи – тăван чĕлхе»  олимпиадăна Пăлапуç Пашьел  вăтам шкулĕнчен харăсах икĕ ача хутшăнма тивĕçрĕ. Вĕсем: 9-мĕш класра вĕренекен Светлана Матюшкина (верентекенĕ – С.П.Никитина)  тата 10-мĕш класс вĕренекенĕ  Сергей Мешков (вĕрентекенĕ – И.В.Матюшкина). Пултаруллă ачасем çак пысăк пелтерĕшле олимпиадăра та призерсен шутне кĕме пултарчĕç. Вĕсене саламлатпăр, малашне те çитĕнÿсем тума хавхалану, хастарлăх сунатпăр.