Тĕп суйлав комиссийĕн председателĕ – Геннадий Федоров

Чăваш Енĕн Тĕп суйлав комиссийĕн председателĕ пулма Геннадий Фёдорова шаннă. Декабрĕн 9-мĕшĕнче республикăн Правительство çуртĕнче Тĕп суйлав комиссийĕн çĕнĕ йышĕн (унăн полномочийĕ 5 çула пырĕ) йĕркелÿ ларăвĕ иртнĕ. Унта комисси ертÿçисене суйланă. Вăрттăн сасăлавра Чăваш Енĕн Тĕп суйлав комиссийĕн председателĕ пулма Геннадий Федорова суйланă, председателĕн çумĕ пулма Игорь Михайлова шаннă, секретарь пулса Олег Ефимов тăрăшĕ. Геннадий Фёдоров РФ Президенчĕн федерацин Атăлçи округĕнчи тĕп инспекторĕ пулса ĕçленĕ. Нумаях пулмасть вăл Чăваш Енĕн Тĕп суйлав комиссине ĕçлеме куçнă.

Ял туризмĕ

Республикăра ял туризмĕ вăй илсех пырать. Çак ыйтăва республика ертÿçисем те час-часах хускатаççĕ, ăна лайăхрах аталантармалли çул-йĕр шыраççĕ. Чăваш Енре ял туризмне аталантарни ялта пурăнакансен пурнăç шайне ÿстерме, ĕç вырăнĕсем йĕркелеме, экономикăна çирĕплетме пулăшать. Çынсене республикăри сывлăх сыхлавĕпе, культурăпа, сунарпа, пулă тытассипе тата ытти енпе çыхăннă экскурси  маршручĕсем уйрăмах кăсăклантараççĕ.  ЧР ял хуçалăх министрĕ Сергей Артамонов хăнасене наци йăли-йĕркипе, апат-çимĕçĕпе, культурипе паллашма сĕнет. Çакă туристсен хушшинче регион ятне-шывне çĕклеме пулăшĕ.

Сумлă ĕçсемшĕн - преми

Декабрĕн 1-мĕшĕнче Чăваш Республикин Çамрăксен патшалăх премине илмешкĕн документсем йышăнма пикеннĕ. Ĕçсене 2022 çулхи апрелĕн 1-мĕшĕччен Чăваш Республикин Пуçлăхĕ çумĕнчи ЧР Çамрăксен патшалăх премийĕн комиссине çак адреспа кайса памалла: Шупашкар хули, Ленинград урамĕ, 33-мĕш çурт, 30-мĕш пÿлĕм. Премие кăçал экономика пурнăçланă тата пичетленнĕ сумлă ĕçсемшĕн параççĕ.

Сĕте фермăрах сутма юрать

Фермерсемпе ял хуçалăх кооперативĕсем хăйсем туса кăларакан продукцие аякка каймасăрах, вырăнтах, сутма пултарĕç. Кун пирки калакан саккуна Раççей Президенчĕ Владимир Путин алă пуснă. Пахча çимĕçе, улма-çырлана, ял хуçалăхĕн ытти продукцине вĕсем хăйсен складĕнче, управĕнче те сутайĕç. Сăмахран, тин кăна сунă сĕте фермăран та туянма юрать. Сухаланă уйра суту-илÿ речĕсем вырнаçтараймĕç паллах. Анчах унпа юнашар палатка лартса фермер хăйĕн продукцине сĕнейĕ.

Телемедицина

Чăваш Республикинче «Сывлăх сыхлавĕ» наци проекчĕн мероприятийĕсене пурнăçлас ĕç малалла пырать. Унăн тĕп çул-йĕрĕсенчен пĕри – сывлăх сыхлавĕн пĕрлехи цифра контурне йĕркелемелли проекта пурнăçласси, çав шутра граждансене медицина пулăшăвĕ кÿнĕ чухне телемедицина технологийĕсене ĕçе кĕртесси, вĕсене аталантарасси, çĕнетсе пырасси. Телемедицинăра шăпах пациентсене инçетрен консультаци парасси, диагностика тăвасси анлă сарăлнă тата нумай çын усă куракан сервис шутланать. Врачсен е врачпа пациент хушшинчи видеоконференцçыхăнăвăн системисем енсен шанчăклă хутшăнăвне тивĕçтерме пулăшаççĕ, çак çыхăну вăхăтĕнче вĕсем пĕр-пĕрне курма тата илтме кăна мар, графика тата тест кăтартăвĕсене пама та пултараççĕ.