Этнолог, тĕне тĕпчекен, истори ăслăлăхĕсен докторĕ, Чăваш Республикин наукăн тава тивĕçлĕ ĕçченĕ Антон Кириллович Салмин (20.10.1949) 75 çул каялла Кивĕ Ахпỹртре çуралнă.

А. Салмин - И.Н.Ульянов ячĕллĕ Чăваш патшалăх университечĕн выпускникĕ. Вăл 1974-1983 çулсенче хăй пĕлỹ илнĕ университетрах аслă лаборант, ассистент, "Коммунизм ялавĕ" (халĕ "Хыпар") хаçатра куçаруçă пулса ĕçленĕ. 1986-2004 çулсенче Чăваш патшалăх гуманитари ăслăлăхĕсен институтĕнче тăрăшнă: аслă, каярахпа тĕп сотрудник, тĕн ăслăлăхĕсен лабораторийĕн заведующийĕ. 2004 çултанпа - Раççей наукисен академийĕн библиотекин наукăн аслă сотрудникĕ тата Аслă Петр ячĕллĕ Раççей наукисен академийĕн антропологипе этнографи музейĕн (Санкт-Петербург) тĕп сотрудникĕ.

Ăсчахăн ĕçĕ-хĕлĕ пĕтĕмпех чăваш халăхĕн фольклорне, йăли-йĕркине, тĕнне, этнологине тĕпчессипе çыхăннă. Вăл халăх сăмахлăхне жанрсем çине пайлас, йăли-йĕркине тĕпчес ĕçре ятарлă методологи йĕркелесе çитернĕ.

 Ентешĕмĕр наукăн 270 ĕçĕн, вăл шутра 20 монографин авторĕ. Вĕсен шутĕнче: "Савиры, булгары и тюрко-монголы в истории чувашей", "Академические исследования этнической самобытности чувашского народа", "История чувашского народа: анализ основных версий", "История чувашского народа: савирская гипотеза", "Древние праздники чувашей", "Жертвенные дары у чувашей", "Народная обрядность чувашей", "Предводители обрядов у чувашей", "Семантика дома у чувашей", "Система верований чувашей", "Три чувашских божества", "Колдуны и знахари", "Система религии чувашей", "Праздники, обряды и верования чувашского народа" тата ыттисем те.

Вăл Чăваш Республикин Патшалăх Канашĕн Хисеп грамотине тивĕçнĕ.

 ("Çулталăк кĕнекинчен")