Предпринимательсене саламланă

Шупашкарти Чăваш патшалăх çамрăксен театрĕнче предпринимательсене професси уявĕпе Чăваш Республикин Пуçлăхĕ Михаил Игнатьев саламланă. Вăл бизнес-пĕрлĕх представителĕсене регионăн инвестици илĕртỹлĕхне ỹстерме пулăшнăшăн тав тунă, патшалăх пĕчĕк тата вăтам предпринимательлĕхĕн субъекчĕсене кỹрекен пулăшу мерисем çулсеренех ỹссе пынине палăртнă. Пухăннисене çавăн пекех ЧР экономика аталанăвĕн, промышленноçпа суту-илỹ министрĕн тивĕçĕсене вăхăтлăх пурнăçлакан Светлана Ананьева, РФ Патшалăх Думин депутачĕ Николай Малов саламланă.

Республика кунне хатĕрленеççĕ

Республика кунне кăçал Шупашкарта тата Улатăр районĕнчи Кивĕ Эйпеçре уявлаççĕ. Халĕ унта ха- тĕрленỹ ĕçĕсем пыраççĕ. 5 гектарта тĕрлĕ çурт-йĕр хăпартаççĕ, уяв лапамне тирпей-илем кĕртеççĕ. Кивĕ Эйпеçре Улатăр районĕнчи халăхсен культура этнопаркĕ пулĕ. Унсăр пуçне вырăс, чăваш тата ирçе наци культурисем çинчен калакан уйрăм лаптăксем те. Проект авторĕ - ЧНКн "Чăваш ялĕ" комитет председателĕ Эдуард Бахмисов.

Чаплă уяв йĕркелĕç

Июнĕн 1-мĕшĕнче Шупашкарта "СТАНЬ ПЕРВЫМ!" акци иртет. Ирхине Чăваш Енĕн тĕп хулине вертолетпа Леонид Якубовичпа Юлия Барановская вĕçсе килеççĕ. Вĕсем ача-пăчана уяв ячĕпе саламласа мороженăйпа сăйлĕç. Паллă телеертỹçĕсем, актерсем, юрăçсем тата спортсменсем Республика ача-пăча клиника больницине тата ача-пăча реабилитаци центрне çитĕç, çĕнĕ ача сачĕ уçĕç, "Мечты сбываются" проектпа килĕшỹллĕн парнесем парĕç, хулан ача-пăча командипе футболла вылĕç. Каçхине "Шупашкар-Арена" пăр керменĕнче чаплă уяв концерчĕ пулать. Уявăн чи асра юлмалли мероприятийĕ вара - Хĕрлĕ лапамра иртекен гала-концерт.

Конкурс иртĕ

Шупашкар 550 çул тултарнă тĕле республикăри композиторсемпе сăвăçсен пултарулăхне палăртакан "Шупашкар хулипе мухтанатăп" конкурс иртет. Заявкăсене майăн 25-мĕшĕччен йышăннă.

20 пин тенкĕ тỹленĕ те…

Шупашкарта пурăнакан 32 çулхи гражданин Интернет урлă çăмăл автомашинăн хăвăртлăх коробкине туяннă чухне ултав тỹснĕ. Сутуçăна маларах электронлă майпа 20000 тенкĕ тỹленĕскер шаннă тавара кĕтсе илеймен. Çак ĕçпе уголовлă ĕç пуçланă. Интернет урлă тавар туяннă чухне тимлĕ те сыхă пулмалла, шанчăклă сутуçăсемпе çеç çыхăнма тăрăшăр.

Инвалида - тимлĕх

Сусăр çынна уйрăмах пысăк тимлĕх кирлĕ. Çакна тĕпе хурса Раççей Федерацийĕн территорийĕнче пурăнакан пенси ỹсĕмĕнчи е инвалида тухнă çынсене патшалăх енчен палăртнă социаллă пулăшу мелĕсемпе усă курма мĕн пур майсем туса панă. Ку тĕлĕшпе пирĕн республикăра та начар мар ĕçлеççĕ.

Тĕллевсĕр усă курнă, вăрланă

Коррупципе çыхăннă уголовлă ĕçсен шучĕ пĕлтĕр республикăра, 2017 çултипе танлаштарсан, 58 процент чухлĕ хушăннă пулин те чылай районта çакнашкал ĕçсен йышĕ чакнă. Иртнĕ çул муниципалитетсен 4 пуçлăхĕ, 15 депутат, суйлав комиссийĕн 3 членĕ тĕлĕшпе 52 уголовлă ĕç пуçарнă. Çак тĕслĕхсенчен ытларахăшĕ бюджет укçине вăрланипе е патшалăх тата регион программисене пурнăçланă чух унпа тĕллевсĕр усă курнипе çыхăннă.